Page 17 - A Rotinonhsyón:ni Representation of the Ethical Standards for the Teaching Profession

ONTARIO COLLEGE OF TEACHERS
Artist’s Statement - Ethical Standard of Respect
Mohawk Translation - Atatkwennyénhtshera Nikarihó:ten
Yerahstányons Akowén:na:
Atatkwennyénhtshera wá:tonhs ne ahoti’nikonriyóhake táhnon ahonata’karitéhake’ ne akwé:kon nè:ne rontaweyà:tha táhnon rotiyó’te. Tehshakotíhsnye’s ne ó:ya nihotirihò:tens nè:ne tehatitáhkwens, rotirihwaséhton, táhnon tehonatonhwentsyó:nihs.
Kayanerenhsera’kó:wa wahonten’nikonríhsa’ shikahá:wi, akwé:kon raotsihkwa’shón:’a ehtàke wahonná:ti’ tsi tkakwí:rote ne Tsyonerahtase’kó:wa táhnon wa’onhtén:ti’ tsi tkahyonhatátye onhwentsyò:kon.
Skén:nen, ka’sahtsténhsera, táhnon ka’nikonhrí:yo ne kanorónhston ne Tsyonerahtase’kó:wa, né:’e tsi ne’e aonhá:’a tkarón:tehs táhnon óhonte nikanerahtò:ten tyohserakwé:kon. Kayé:ri nikawerá:ke nonká:ti yo’thontón:nis ne aohtè:ra: othorè:ke, entyéhke, tsi’ tkarahkwí:neken’s, táhnon tsi yatewatshóthos. Yaweronhátyen ónkha wá:tonhs ne ayonthahí:ne’ ne aohtè:ra tsi niyó:re aontá:yen’ tsi tkarón:tote.
Ne kí:ken tyorihò:ten, skén:nen ne’e kén:ton tsi ye’nikonrayé:ri táhnon yakota’karí:te. Ka’sahtsténhsera ne’e kén:ton ne ska’nikòn:rat áhontste’. Étho ní:yoht tekahsennakerá:tats ne onkwe’shón:’a. Sewatyé:ren ens ka’nikonhrí:yo yena’tónkhwa ne ‘righteousness’, ‘compassion’ tókani ‘fairness’ ne Tyorhenhsa’kéha.
Enwá:ton’ ne aetewanonhtónnyon’ tsi nahò:ten óya roná:tih ne Rotinonhsyón:ni nè:ne yorihwáksen nè:ne ahontkáhtho’/ahshakotina’tónhahse’, nè:ne ahonthón:tate’/ahonní:ron’. Skáhne, skén:nen, ka’sahtsténhsera, táhnon ka’nikonhrí:yo karihón:nis ne Kayanerenhsera’kó:wa.
A Rotinonhsyón:ni Representation of the Ethical Standards for the Teaching Profession
13